«Չեստնի զնակ» մակնշման համակարգը արգելափшկել է ՀՀ-ում արտադրված «Ջերմուկ» հանքային ջրի ևս գրեթե 1,1 միլիոն շշի վաճառքը
- 2 hours ago
- 1 min read
«Չեստնի զնակ» մակնշման համակարգը Ռոսպոտրեբնադզորի հանձնարարականով արգելափակել է Հայաստանում արտադրված «Ջերմուկ» հանքային ջրի ևս գրեթե 1,1 միլիոն շշի վաճառքը: Այս մասին РБК-ին հայտնել են Ռոսպոտրեբնադզորի մամուլի ծառայությունից:
Սահմանափակումները մտցվել են արտադրանքի նոր խմբաքանակների ստուգման արդյունքում, որոնք թողարկվել են 2025 թվականի հոկտեմբերի 23-ից մինչև 2026 թվականի մարտի 27-ը։ Ռոսպոտրեբնադզորից հայտնել են, որ նմուշներում հայտնաբերվել են պարտադիր պահանջների խախտումներ։ Սահմանափակումները կիրառվել են քաղաքացիների կյանքին և առողջությանը հնարավոր վնասը կանխելու համար։ Արգելափակման տակ են հայտնվել տարբեր տարաներով թողարկված արտադրանքի ինը ամսաթվեր։
«Մակնշման համակարգը հանդես է գալիս որպես սպառողների պաշտպանության հուսալի թվային մեխանիզմ։ Ստանալով կարգավորողի հարցումը՝ մենք օպերատիվ կերպով կասեցրել ենք ապրանքի յուրաքանչյուր միավորի վաճառքը ողջ երկրում. գնորդներին պարզապես չեն կարողանա վաճառել պոտենցիալ վտանգավոր ապրանքը։ Համակարգը տեսնում է շուկայի ողջ կառուցվածքը՝ ապրանքի թողարկումից մինչև դրա վաճառքը. դա մեզ թույլ է տալիս ակնթարթորեն մեկուսացնել հայտնաբերված խախտումներով արտադրանքը և երաշխավորել, որ վաճառասեղաններին կհայտնվի միայն անվտանգ և ստուգված արտադրանք»,- պարզաբանել է Ռազմավարական տեխնոլոգիաների զարգացման կենտրոնի գլխավոր տնօրենի տեղակալ Ռևազ Յուսուպովը։
Հիշեցնենք, որ ավելի վաղ՝ ապրիլի 27-ին, արդեն կասեցվել էր 338 հազար շշի իրացումը։ Այսպիսով, ժամանակավոր սահմանափակման տակ գտնվող արտադրանքի ընդհանուր քանակը հասել է 1,4 միլիոն միավորի։ Մինչև լրացուցիչ ստուգումների ավարտը և թույլտվության ստացումը ապրանքը չի թույլատրվի վաճառքի։
