Եվրահանձնաժողովը հաստատել է ԵՄ ներսում հավաքական պաշտպանության վերաբերյալ որոշումների կայացման առաջին վարժանքների անցկացումը
- 15 hours ago
- 1 min read
Եվրահանձնաժողովը հաստատել է ԵՄ ներսում հավաքական պաշտպանության վերաբերյալ որոշումների կայացման առաջին վարժանքների անցկացումը. դրանք տեղի են ունեցել Բրյուսելում՝ դեսպանների մակարդակով։ Այս մասին հայտարարել է Եվրահանձնաժողովի ներկայացուցիչ Անիտա Հիփերը, հաղորդում է ՏԱՍՍ-ը:
«Այո, նման հանդիպումն իսկապես այսօր տեղի է ունենում ԵՄ քաղաքականության և անվտանգության հարցերով հանձնաժողովում՝ դեսպանների մակարդակով։ Այնտեղ այսօր քննարկում կանցկացվի՝ հիմնված տարբեր սցենարների գնահատման վրա»,- նշել է նա։
Հիփերն ընդգծել է, որ զորավարժությունների սցենարը նախատեսելու է փոխգործակցություն ԵՄ երկրների միջև՝ անվտանգության ոլորտում փոխօգնության մասին հոդվածի համաձայն։
Խոսքը Եվրոպական միության մասին պայմանագրի 42.7 հոդվածի մասին է, որը ենթադրում է ԵՄ երկրների պարտավորությունը՝ միմյանց ռազմական աջակցություն ցուցաբերել արտաքին ագրեսիայի դեպքում։
Այս հոդվածի հնարավոր գործարկման մեխանիզմների մշակումը՝ եվրոպական հավաքական պաշտպանությունն ապահովելու նպատակով, սկսվել է ՆԱՏՕ-ի ներսում վստահության ճգնաժամի ֆոնին, որն առաջացել է ԱՄՆ-ի և ԵՄ-ի միջև շարունակվող ու խորացող հակամարտության պատճառով։
