Կալանքի էլ հնարավոր է տանեն Գագիկ Ծառուկյանին, այս քայլերը բացարձակ անակնկալ չէին. պաշտպան

Հնարավոր է, որ կալանքի էլ տանեն Գագիկ Ծառուկյանին, այս քայլերը բացարձակ անակնկալ չէին։ Այս մասին, այսօր՝ հուլիսի 6–ին, ԲՀԿ առաջնորդ Գագիկ Ծառուկյանի տան մոտ լրագրողների հետ զրույցում նշեց փաստաբան Երեմ Սարգսյանը։

«Առանց հոդվածների նայելու էլ, այն հռետորաբանությունը, որ կա մինչև այս, բոլորս էլ կարծում եմ՝ կանխատեսում էինք, որ նման գործողություններ են ձեռնարկելու, և սա բացարձակ անակնկալ չէր։ Առանց հոդվածների ամեն ինչ պարզ է, հա, իսկ հոդվածների մասով միշտ հնարավոր է ինչ-որ բան ստեղծագործել, իսկ վերջին շրջանում այդ ստեղծագործությունը շատ պարբերաբար բնույթ է կրում։

Հիմա ավելի բովանդակային, երբ որ ծանոթանանք, կանդրադառնանք, բայց ամեն ինչ հնարավոր է, որովհետև գործողությունների շարքը ավելի շատ նման ինչ-որ կանխատեսումներ տեղիք են տալիս»,–ասաց նա։

Հարցին՝ հնարավո՞ր է կալանավորեն Ծառուկյանին, փաստաբանը կարճ պատասխանեց. «Գուցե, տեսնենք»։

Նա տեխնիկական համարեց այն, որ մինչև հիմա իրենց թույլ չեն տվել ներս մտնել. «Հիմա սպասում ենք, որ քննիչը երևի տեղակացվի, Ընդամենը տեխնիկական է, կարծում եմ, պետք է այստեղից քննիչին զգուշացնեն, որովհետև գործողության պատասխանատուն քննիչն է,  քննիչը պետք է թույլ տա կամ չտա։ Հիմա երևի վերևից կասի դրա մասին, որ բարձրանանք։ Չեմ կարծում, որ նման խախտում անեն, ասեն, թե չեն տալիս»։

Ավելի վաղ NEWS.am–ը հայտնել էր, որ այսօր՝ հուլիսի 6–ի վառ առավոտյան խուզարկություն է իրականացվում Գագիկ Ծառուկյանի տանը։ Ավելի ուշ ԲՀԿ առաջնորդի խոսնակ Իվետա Տոնոյանը հայտնել էր, որ լայնածավալ խուզարկություններ են իրականացվում նաև «Մուլտի Գրուպ» կոնցեռնի կազմում ընդգրկված գրեթե բոլոր ընկերություններում, ինչպես նաև այդ կազմակերպությունների տնօրենների բնակարաններում։

ԲՀԿ անդամ Արման Աբովյանը հայտնել էր, որ Գագիկ Ծառուկյանի տունը շրջապատված է, ինչ–որ ռազմական հագուստով ավտոմատավորներ են։ Ավելի ուշ Աբովյանը նոր տեսանյութ է տարածել Ծառուկյանի տան դիմացից՝ նշելով, որ վերևում դրոններ են աշխատում. «Որոշ տվյալներով նաև Գագիկ Ծառուկյանին պատկանող կամ նրա հետ կապ ունեցող վայրեր են մտել խուզարկության.  Խոսքը վերաբերում է Կոնյակի գործարանի, Օլիմպավանի, «Մուլտի վելնես» ընկերության մասին է»։

Այս առնչությամբ Քննչական կամիտեից NEWS.am—ին միայն հայտնել էին. «Քրեական վարույթի շրջանակում կատարվում են անհրաժեշտ քննչական և վարութային գործողություններ, ավելի ուշ հանդես կգանք պաշտոնական հաղորդագրությամբ»։

Հիշեցնենք, որ օրեր առաջ դատախազությունը միջնորդություն էր ներկայացրել ԿԸՀ՝ Գագիկ Ծառուկյանի անձեռնմխելիությունը հաղթահարելու, որն այդպես էլ չէր քննարկվել։

Վարչապետ Նիկոլ Փաշինյանը նախընտրական քարոզարշավում սպառնացել էր ունեզրկել ու կալանավորել իր ընդդիմախոսներին։ Մասնավորապես, խոսքը Սամվել Կարապետյանի, Ռոբերտ Քոչարյանի և Գագիկ Ծառուկյանի մասին էր։