«Սկզբունքային ու հայրենանվեր լրագրությունը՝ պետության ամրության հենասյուն»․ Մհեր Մելքոնյան
- Elen Hovsepyan
- Oct 16
- 1 min read
ԱԺ «Հայաստան» խմբակցության պատգամավոր Մհեր Մելքոնյանի ֆեյսբուքյան գրառումը․ «Սիրելի՛ լրագրողներ, խմբագիրներ և մամուլի ոլորտի ներկայացուցիչներ,
Սրտանց շնորհավորում եմ ձեզ Հայ մամուլի օրվա առթիվ։
1858 թ. հոկտեմբերի 16-ին լույս տեսած «Ազդարար» թերթով սկիզբ դրվեց մի գործընթացի, որը հետագայում ձևավորեց ազգային միտքն ու քաղաքացիական իրազեկման համակարգը։ Այդ օրվանից ի վեր հայ մամուլը եղել է ոչ միայն հասարակական կարծիքի ձևավորման առանցքային հարթակ, այլև պայքարի գոտի՝ հանուն ազգային ինքնության, պետականության և արժանապատիվ ապագայի։
Այսօր, երբ աշխարհը կանգնած է տեղեկատվական պատերազմների, համատարած ապատեղեկատվության և հանրային գիտակցության մանիպուլյացիայի իրական սպառնալիքների առաջ, հայ մամուլի դերը դառնում է ոչ միայն կարևոր, այլ՝ ռազմավարական։ Ուժեղ, սկզբունքային, փաստարկված և հայրենանվեր լրագրությունը պետք է դիտարկվի որպես պետության ամրության հենասյուն։
Ձեր աշխատանքը հաճախ պահանջում է վճռականություն, բարոյական ամրություն, իսկ երբեմն՝ նաև անձնական քաջություն։ Այս պատասխանատու ոլորտում գործելն արժանի է խորագույն գնահատանքի։
Վստահ եմ, որ լրագրողական համայնքն իր մասնագիտական բարձր չափանիշներով, սկզբունքայնությամբ և անկախությամբ կշարունակի բարձր պահել ճշմարիտ խոսքի դրոշը՝ ի շահ մեր երկրի կայունության, հասարակության իրազեկության և ապագայի նկատմամբ վստահության։
Թող ձեր խոսքը լինի համարձակ, ձեր վերլուծությունը՝ խորքային, իսկ ձեր նպատակը՝ հանրային բարձր շահի անշեղ պաշտպանությունը»։
