«Սերժ Սարգսյանը մեկ շաբաթ ուշ մատուցեց Նիկոլ Փաշինյանի ծննդյան նվերը»․ Էդմոն Մարուքյան

ԼՀԿ ղեկավար Էդմոն Մարուքյանի թելեգրամյան գրառումը․ «Այլընտրանք, որով ակնարկում են այլընտրանքի բացակայության մասին։

Սերժ Սարգսյանը իմպիչմենտի շրջանակներում վարչապետի նոր թեկնածու առաջ քաշելով փորձում է ժողովրդին ցույց տալ, որ Փաշինյանի այլընտրանքը տարբեր ժամանակներում բազում քրեական գործերով անցնող իր կուսակիցն է։Ինչը իրենից ներկայացնում է ոչ թե այլընտրանքային թեկնածուի առաջադրում, այլ կեղծ ուղերձ այն մասին, որ Նիկոլ Փաշինյանին չկա այլընտրանք։Վլադիմիր Գասպարյանի թիկնազորի պետ Արշակի փեսային առաջադրելու փոխարեն ՀՀԿ-ն կարող էր ավելի ազնիվ գտնվել և դիմել ժողովրդին՝ Փաշինյանի շուրջը համախմբվելու կոչով։

Հարկ է նաև ընդգծել ընտրված իրավիճակը, որում ի հայտ եկավ «այլընտրանքային թեկնածուն»։Վերջին օրերին Հայ Առաքելական Սուրբ Եկեղեցու դեմ տարվող պիղծ արշավի համար Փաշինյանին քննադատում էին անգամ որոշ թունդ փաշինյանականներ, բայց Սերժ Սարգսյանի թեթև ձեռքով քաղաքական և տեղեկատվական դաշտում հայտնվեց ձախողման դատապարտված, ձևական թեկնածուն։ Հիմա բոլորն իշխանությանը քննադատելու փոխարեն այդ մեռելածին նախաձեռնությունն են քննարկում։

Սարգսյանը մեկ շաբաթ ուշ մատուցեց Փաշինյանի ծննդյան նվերը, սակայն ինչպիսի առատաձեռնությամբ»։