Փաստաբաններն ապշած են դատավոր Կարեն Ֆարխոյանի որոշումից
- Elen Hovsepyan
- Nov 20
- 2 min read
«Սրբազան պայքարի» գործով անցնող միակ կին քաղբանտարկյալ Լիդիա Մանթաշյանը կշարունակի մնալ կալանավորված։ Նրա նկատմամբ խափանման միոջոց կալանքը Երևանի ընդհանուր իրավասության քրեական դատարանը երկարացրել է 3 ամսով։
Փաստաբաններն ապշած են դատավոր Կարեն Ֆարխոյանի որոշումից։
«Ոչ մի ձև չեմ տեղավորվում այն իրականության մեջ, որում նույն գործով տասը տղամարդ քաղբանտարկյալ բանտից ազատ արձակած դատավորը երկարացնում է Լիդիայի բանտարկությունը ևս երեք ամսով։ Խի՞, էլի, խի՞», ֆեյսբուքյան իր էջում գրառում է կատարել Ռուբեն Մելիքյանը։
Փաստաբան Արսեն Բաբայանն էլ անտրամաբանական է որակել դատարանի որոշումը, որակելով այն պարզապես «պատիժ»։
«Լիդյա Մանթաշյանի կալանքի երկարաձգումը չունի որևէ այլ տրամաբանություն, քան կալանքը որպես ՊԱՏԻԺ կիրառելն է։ Լիդիան ՔԱՂԲԱՆՏԱՐԿՅԱԼ Է և կրում Է ՊԱՏԻԺ առանց դատարանի օրինական ուժի մեջ մտած մեղադրական դատավճռի պայմաններում»,- գրում է Արսեն Բաբայանը։
Լիդիա Մանթաշյանի պաշտպան Տաթևիկ Սողոյանը անհասկանալի է համարանում դատարանի վերաբերմունքը գործով անցնող միակ կնոջ նկատմամբ՝ նրան պարտադիր կալանքի տակ պահելու վճռականությունը։
«Սրբազան պայքարի» գործով անցնող միակ կին մեղադրյալ Լիդիա Մանթաշյանի անունը գործի ապացույցներում հիշատակվում է ընդամենը 2-3 անգամ, անհասկանալի է՝ ինչու նրա խափանման միջոց կալանքը չի փոխվում: Մինչդեռ նույն գործով կան այլ մեղադրյալներ, որոնք համարվելով, այսպես ասած, առանցքային դերակատարներ՝ արդեն ազատվել են կալանքից և նրանց խափանման միջոցը փոխվել է»,- ասել է Լիդիա Մանթաշյանի պաշտպան Տաթևիկ Սողոյանը:
«Մեղադրանքի հիմքում Լիդիա Մանթաշյանի նոթատետրի գրառումներն են, որոնք վերաբերել են նախորդ տարվա ցույցերին։ Մի խոսակցություն կա, որտեղ փորձարկում են գունավոր ծուխ, թե քանի վայրկյան տևողության է։ Եվ այդ տխրահռչակ ու ծաղրի արժանացած ժողովրդական անցման պլանն է: Այս երեք «ապացույցն» է, որի հիմքով կալանավորել են։ Թե դա ահաբեկչության կազմակերպման հետ ինչ կապ ունի, չկա որևէ հիմնավորում: Կալանքի տակ պահելը ունի բացառապես պատժիչ նպատակ: Նույնիսկ Բագրատ Սրբազանի դեպքում, որ այս գործով առաջնային դեմք է, նրա տեսակցությունները բաց են, Լիդիայի պարագայում նույնիսկ այդ սահմանափակումներն են պահել: Չեմ կարողանում հասկանալ՝ ինչու են Լիդիայի նկատմամբ այսպիսի մոտեցում որդեգրել, տրամաբանություն չեմ գտնում»,- ասել է փաստաբան Տաթևիկ Սողոյանը։
Ինքը՝ Լիդիա Մանթաշյանը վստահ է, որ «գործը կարված է».
«Սա պատժի ձև է, գիտեմ՝ ինչի համար են ինձ պատժում։ Որոշ պաշտոնյաների վերաբերյալ ինֆորմացիաներ են իմ միջոցով հայտնի դարձել, ու նեղվում են դրանից։ Այս գործը կարել են»,- դատական նիստի ժամանակ ասել է Լիդյան։
Հիշեցնենք՝ Բագրատ Սրբազանի և մյուսների գործով անցնող , «Սրբազան պայքար» շարժմանակտիվիստ Լիդիա Մանթաշյանը կալանավորվել էր հունիսի 26-ին երկու ամսով, այնուհետև կալանքի ժամկետը երկարաձգվել էր։ Հիմա նա կալանքի տակ կմնա ևս 3 ամիս
