Բողոքի ակցիայի անհրաժեշտություն կա․ արցախահայությունը պետք է արձագանքի նախագծին․ Անաստաս Իսրայելյան

Արցախցիների փոքր կազմ՝ 1–3 անդամ ունեցող ընտանիքներին վերաբերող կառավարության որոշման նախագիծը ժողովրդի շահերից չի բխում։ Այս մասին «Փաստինֆո»-ի հետ զրույցում ասաց «Վերածնվող արցախ» հասարակական կազմակերպության նախագահ Անաստաս Իսրայելյանը։

«Սա իշխանությունների քարոզչական հնարքներից է։ Կանխատեսում եմ, որ առաջիկայում արցախցիներին վերաբերող նման պոպուլիստական խոստումներ, ծրագրեր ու հայտարարություններ շատ կլսենք»,- նշեց նա։

Ա․ Իսրայելյանն ընդգծեց, որն նմանատիպ՝ երկարաժամկետ վարձակալությանն ուղղված ծրագիր, որը, ի տարբերություն հրապարակած նախագծի, ընդգրկելու էր բոլոր տեղահանված արցախցիներին, քննարկվել է դեռ 2023 թվականի աշնանը։

«2025 թվականի գարնանը՝ արցախցիների իրավունքների պաշտպանության խորհուրդի կազմակերպած բողոքի ցույցերի ժամանակ, երբ հանդիպում էինք Կառավարության ներկայացուցիչների հետ՝ կրկին առաջարկել էինք նմանատիպ ծրագիր, բայց վիրավորական ու ցինիկ ձևով կտրականապես մերժել էին։ Ու հիմա նման նախագիծ են շրջանառում, որն ուղղված է միայն որոշակի խմբի, այսպիսով արցախցիներին լարում են միմյանց դեմ։ Սրիկայություն է՝ ցեղասպանված մարդկանց իրար դեմ հանելը։ Փախստականների մեջ չպիտի տարանջատում լինի։ Սա այս իշխանությունների կառավարման ոճն է»,- արձանագրեց ՀԿ նախագահը։

Ըստ նրա՝ նախագծի շուրջ արցախցիների հետ քննարկումներ չեն եղել։

«Իշխանություններն ունեցել են բոլոր հնարավորություններն արտագաղթ թույլ չտալու համար, բայց ոչինչ չեն արել։ Մեր ժողովրդին կոչ եմ անում՝ ստերի չհավատալ։ Հիմա բողոքի ակցիայի անհրաժեշտություն կա։ Արցախցին պետք է արձագանքի այս նախագծին, որպեսզի վերանայեն որոշումներն ու լուրջ զբաղվեն փախստականների հարցերով»,- ասաց Ա․ Իսրայելյանը՝ հավելելով, որ հանդես կգա հայտարարությամբ։