«Վիվա Արմենիա» ՓԲԸ-ի պարտատոմսերը ցուցակվել են Հայաստանի ֆոնդային բորսայում

Հայաստանի ֆոնդային բորսան (AMX) ուրախությամբ ընդունում է ևս մեկ խոշոր ընկերության մուտքը կապիտալի շուկա․ «Վիվա Արմենիա» ՓԲԸ-ի դոլարային պարտատոմսերը հուլիսի 15-ից ցուցակվելու են Հայաստանի ֆոնդային բորսայում։ Այսօր տեղի է ունեցել ավանդական բորսայական զանգի հնչեցման արարողությունը, որը խորհրդանշում է ընկերության պարտատոմսերի` բորսայում շրջանառության մեկնարկը։

«Վիվա Արմենիա» ՓԲԸ-ի պարտատոմսերը, ընդհանուր 80 միլիոն ԱՄՆ դոլար ծավալով, ընդգրկվել են Հայաստանի ֆոնդային բորսայի պարտատոմսերի երկրորդային՝ Bbond ցուցակում։ Ցուցակվել է 800,000 հատ պարտատոմս՝ յուրաքանչյուրը 100 ԱՄՆ դոլար անվանական արժեքով, 7․65% արժեկտրոնային եկամտաբերությամբ (վճարման կիսամյակային պարբերականությամբ) և 36-ամսյա շրջանառության ժամկետով։ Այս պարտատոմսերով հնարավոր է իրականացնել հասցեական առևտուր և կնքել ռեպո գործարքներ։

Նշենք, որ այս թողարկումն իր ծավալով ներկայումս ամենախոշորն է բորսայում շրջանառվող կորպորատիվ դոլարային պարտատոմսերի շարքում՝ ընդգծելով շուկայի աճի և տեղական ներդրումային հնարավորությունների ընդլայնման միտումը։

Պարտատոմսերի տեղաբաշխումն իրականացվել է 2025 թվականի փետրվարի 12-ից մինչև հունիսի 23-ն ընկած ժամանակահատվածում՝ «Ամերիաբանկ» ՓԲԸ-ի միջոցով։ Ընդ որում, թողարկված պարտատոմսերն ամբողջությամբ տեղաբաշխվել են: Ներդրողները հուլիսի 15-ից կարող են գործարքներ իրականացնել «Վիվա Արմենիա» ՓԲԸ-ի պարտատոմսերով բորսայի առևտրային հարթակում՝ դիմելով բորսայի անդամ բանկերի կամ ներդրումային ընկերությունների։

«Վիվա Արմենիա»-ն իր շուրջ 20-ամյա գործունեության ընթացքում կարևոր դեր ունի Հայաստանի ՏՀՏ ոլորտների զարգացման գործում՝ սպասարկելով ավելի քան երկու միլիոն բաժանորդ ողջ երկրի տարածքում։

 «Ուրախ ենք տեսնել կապիտալի շուկայի նման խոշոր խաղացողի՝ «Վիվա Արմենիա»-ի ակտիվ ներգրավվածությունը։ Սա կարևոր քայլ է, որը հաստատում է մեր շուկայի կարողությունները և բացում է նոր ներդրումային հնարավորություններ տեղական և միջազգային ներդրողների համար։ Նման թողարկումները մեծացնում են ֆինանսական համակարգի թափանցիկությունը և խթանում տնտեսության զարգացումը», - նշել է Հայաստանի ֆոնդային բորսայի գլխավոր տնօրեն Հայկ Եգանյանը:

«Պարտատոմսերի մասշտաբային թողարկմամբ կապիտալի շուկա դուրս գալը նոր փուլ է մեր ընկերության աճի ռազմավարության մեջ։ Այս ձեռքբերումն արտացոլում է «Վիվա Արմենիա»-ի կայուն ֆինանսական հիմքը, ինչպես նաև թափանցիկության, նորարարությունների և Հայաստանի թվային ապագայի մեջ երկարաժամկետ ներդրումներ կատարելու մեր հանձնառությունը։ Մենք hպարտ ենք, որ ներդրողներին հնարավորություն ենք տալիս համատեղ զարգացնել երկրի հեռահաղորդակցական և տեխնոլոգիական միջավայրը», - ասել է «Վիվա Արմենիա» ՓԲԸ-ի գլխավոր տնօրեն Արմեն Ավետիսյանը:

«Իսկապես պատմական իրադարձություն է «Վիվա Արմենիա»-ի, Ամերիաբանկի և ընդհանրապես մեր երկրի կապիտալի շուկայի զարգացման համար։ Նման խոշոր ու կայուն ընկերության մուտքը կապիտալի շուկա քաղաքացիների համար ներդրումային որակապես նոր հնարավորություններ է ստեղծում։ Սա Հայաստանի կապիտալի շուկայի պատմության մեջ դարձավ մասնավոր թողարկողի դոլարային պարտատոմսերի ամենախոշոր տեղաբաշխումը, որին, ի դեպ, մասնակցեցին աննախադեպ մեծ թվով ֆիզիկական անձ ներդրողներ՝ շնորհիվ Ամերիաբանկի MyInvest ներդրումային հարթակի»,- իր խոսքում նշել է Ամերիաբանկի Ներդրումային բանկինգի գծով տնօրեն Առնո Մոսիկյանը։

Ընկերությունը Պարտատոմսերի տեղաբաշխման արդյունքում ներգրավված միջոցները ուղղելու է առկա վարկային պարտավորությունների վերաֆինանսավորմանը և/կամ կապիտալ և այլ ռազմավարական ներդրումների իրականացմանը:

«Վիվա Արմենիա» ՓԲԸ-ի պարտատոմսերի թողարկումը ներդրողներին առաջարկում է լրացուցիչ հնարավորություն դիվերսիֆիկացնելու իրենց ներդրումային պորտֆելները՝ միաժամանակ ներդրում կատարելով հեռահաղորդակցության ոլորտի առաջատար ընկերության զարգացումը խթանող նախաձեռնությունների մեջ։

Ցուցակված պարտատոմսերի մասին կարող եք իմանալ ավելին՝ անցնելով հղումով։

Ընկերության պարտատոմսերը հնարավոր է ձեռք բերել բացառապես Հայաստանի ֆոնդային բորսայի առևտրային համակարգի միջոցով՝ դիմելով բորսայի անդամ հանդիսացող ցանկացած բանկի կամ ներդրումային ընկերության, բացելով բրոքերային հաշիվ և ներկայացնելով համապատասխան հայտ:

Հայաստանի ֆոնդային բորսան Հայաստանում գործող արժեթղթերի կարգավորվող շուկայի միակ օպերատորն է։ AMX-ն առաջարկում է բորսայական ծառայությունների ամբողջական փաթեթ՝ ցուցակման, առևտրի, քլիրինգային և տեղեկատվական ծառայություններ, այլընտրանքային բորսայական լուծումներ։ Բորսայական վերջնահաշվարկն իրականացնում է Հայաստանի կենտրոնական դեպոզիտարիան, որի 100% բաժնետերը Հայաստանի ֆոնդային բորսան է։ AMX-ի առաքելությունն է զարգացնել կապիտալի շուկայի բորսայական ենթակառուցվածքը՝ այն դարձնելով ֆինանսավորման ակտիվ գործիք Հայաստանի տնտեսության զարգացման համար։