Գլխավոր դատախազությունը դիմել է ԿԸՀ՝ Ռոբերտ Քոչարյանի անձեռնմխելիության հաղթահարման հարցով
- 4 hours ago
- 1 min read
ՀՀ գլխավոր դատախազությունը միջնորդություն է ներկայացրել ԿԸՀ՝ «Հայաստան» դաշինքի առաջնորդ Ռոբերտ Քոչարյանի նկատմամբ քրեական հետապնդում հարուցելու և նրան ազատությունից զրկելու համաձայնություն ստանալու վերաբերյալ։
Խոսքը նույն մարդու մասին է, որը տարիներ առաջ, հստակ իմանալով, որ Հայաստան վերադառնալուն պես իրեն սպասում է կալանավորում, հայտարարեց վերադարձի մասին. «Հայաստան» դաշինքՌոբերտ Քոչարյանին արգելել են հատել ՀՀ սահմանը՝ առանց որևէ իրավական հիմնավորման․ դատարանը արգելք չի սահմանել, նախաքննական մարմինները պնդում են՝ իրենք կապ չունեն
Միջնորդությունը ներկայացվել է հունիսի 15-ին՝ Ծովակ Մնացականյանի կողմից՝ Հակակոռուպցիոն կոմիտեում քննվող քրեական վարույթի շրջանակներում, թե ինչ վարույթի մասին է խոսքը՝ դեռևս հայտնի չէ։ Նույն օրը դատախազությունը միջնորդություն է ներկայացրել ԿԸՀ՝ նույն դաշինքի պատգամավորի թեկնածու Ռուսլան Բարսեղյանի անձեռնմխելիության հաղթահարման հարցով։
Միջնորդությունները կքննվեն հունիսի 17-ին։
Հիշեցնենք, որ հունիսի 14-ին «Զվարթնոց» օդանավակայանում ՀՀ երկրորդ նախագահ Ռոբերտ Քոչարյանին արգելել են հատել ՀՀ սահմանը։ Մինչ այդ երկրորդ նախագահի գրասենյակից հայտնել են, որ նախագահը եռօրյա այցով մեկնում է Հայաստանից, այցը կրում է անձնական բնույթ, վաղուց պլանավորված էր և հետաձգվել էր նախընտրական խիտ գրաֆիկի պատճառով:
«Նախագահի նախկին բազմաթիվ այցերի մասին երբեք նախապես տեղեկատվություն չենք տրամադրել՝ դրանց մասնավոր բնույթի պատճառով: Սակայն, հաշվի առնելով ընդդիմության ներկայացուցիչների այցերի վերաբերյալ իշխանությունների կողմից վերջերս տարածվող կեղծիքները, հարկ ենք համարում հանրությանը զերծ պահել իշխանական կեղծիքների սպասվելիք չափաբաժնից»,- նշված էր նախապես արգելքին նախորդած հաղորդագրությունում։
Այդ պահին Ռոբերտ Քոչարյանը դեռևս մեղադրյալի կարգավիճակ չի ունեցել։
Հեղինակ՝ Իզաբել Սահակյան
