Թրամփը Զելենսկուն կոչ է արել դադարեցնել հարձակումները ռուսաստանյան դիզելային վառելիքի վրա. «Սա դեֆիցիտ է առաջացնում»
Թրամփն այս հայտարարությունն արել է կիրակի օրը՝ պատասխանելով լրագրողի այն հարցին, թե արդյոք ինքը խոսե՞լ է Զելենսկու հետ Ռուսաստանի նախագահ Վլադիմիր Պուտինի հետ վերջերս ունեցած զրույցից հետո։ Ամերիկայի նախագահը ուկրաինացի առաջնորդին կոչ է արել հրաժարվել ռուսաստանյան դիզելային վառելիքի վրա հարվածներից։
«Պարոն Զելենսկին պետք է մի բան անի։ Նա պետք է դադարեցնի Ռուսաստանում դիզելային վառելիքի ոչնչացումը», — ասել է Թրամփը լրագրողներին Irish Open մրցաշարի շրջանակում, որն անցկացվում է Իռլանդիայի Դունբեգում գտնվող իր գոլֆ-ակումբում։
«Թող նա հարձակվի թիրախների վրա, բայց ոչ դիզելային վառելիքի, որովհետև դա դիզելային վառելիքի դեֆիցիտ է առաջացնում», — ավելացրել է ամերիկացի նախագահը։
Ուկրաինան արդեն մի քանի ամիս է հեռահար հարվածներ է հասցնում Ռուսաստանի նավթագազային ոլորտի օբյեկտներին։ Կիևը հայտարարում է, որ Ռուսաստանի էներգետիկ հատվածը ֆինանսավորում է ռազմական գործողությունները և անմիջականորեն ապահովում դրանք վառելիքով։
Ուկրաինական անօդաչու թռչող սարքերի հարձակումների արշավն արդեն հանգեցրել է Ռուսաստանի մի շարք շրջաններում վառելիքի վաճառքի սահմանափակումների, թեև Ռուսաստանը շարունակում է մնալ աշխարհի նավթի և գազի խոշորագույն արտահանողներից մեկը։ Կիրակի օրը Ուկրաինան հայտարարեց Թաթարստանի Նիժնեկամսկում և Կրասնոդարի երկրամասի Կուբանի Սլավյանսկում նավթավերամշակման օբյեկտների վրա հարվածների մասին։
Նիժնեկամսկում երկու մարդ զոհվել է այն բանից հետո, երբ անօդաչու թռչող սարքն ընկել է ծառի վրա՝ կայանված ավտոմեքենայի կողքին, հայտնել են տեղական իշխանությունները։ Քաղաքում գտնվում է խոշոր նավթաքիմիական կլաստեր, որը ներառում է նավթավերամշակման և նավթաքիմիական ձեռնարկություններ։ Նիժնեկամսկի քաղաքապետ Ռադմիր Բելյաևը հայտնել է ձեռնարկություններից մեկում բռնկված հրդեհի մասին։
Ուկրաինայի պաշտպանության նախարարության գլխավոր հետախուզական վարչությունը հայտարարել է, որ իր անօդաչու սարքերը խոցել են նաև Կուբանի Սլավյանսկում գտնվող խոշոր նավթավերամշակման գործարանը, այդ թվում՝ նավթի վերամշակման կայանքը և պահեստարանների համալիրը։ Կրասնոդարի իշխանությունները հայտնել են երեք տուժածի, նավթամուղի վնասման և ձեռնարկությունում բռնկված հրդեհի մասին՝ ուղղակիորեն չհաստատելով տեղի ունեցածի ուկրաինական վարկածը։
Ռուսաստանն էլ, իր հերթին, վերջին շաբաթներին ուժեղացրել է Ուկրաինայի դեմ օդային հարվածները։ Կիրակի օրը ուկրաինական իշխանությունները հայտնել են ռուսաստանյան անօդաչու սարքերի լայնածավալ հարձակման մասին, այդ թվում՝ նոր ռեակտիվ սարքերի, որոնք ավելի դժվար է կասեցնել։ Ուկրաինայի ռազմաօդային ուժերի տվյալներով, Ռուսաստանը ընդհանուր առմամբ արձակել է 453 անօդաչու սարք, որոնցից 409-ը ոչնչացվել կամ ճնշվել են հակաօդային պաշտպանության միջոցներով։
Ռուսաստանը հարվածներ է հասցրել նաև Օդեսային և Ուկրաինայի արևմտյան շրջաններին։ Անօդաչու սարքերից մեկը ընկել է Լեհաստանի հետ սահմանին գտնվող Յագոդին — Դորոհուսկ անցակետի մոտ և հրդեհ է առաջացրել բենզալցակայանում։ Ուկրաինական կողմը հայտարարել է, որ ռուսաստանյան հարվածները նաև վնաս են հասցնում երկրի էներգետիկ ենթակառուցվածքին ձմռան նախաշեմին։
Շարունակվող մարտական գործողությունների ֆոնին Մոսկվան հնարավոր է համարել խաղաղ բանակցությունների վերսկսումը։ Ռուսաստանի նախագահի մամուլի քարտուղար Դմիտրի Պեսկովը կիրակի օրը հայտարարել է, որ Ռուսաստանի, Ուկրաինայի և ԱՄՆ-ի միջև եռակողմ բանակցությունները կարող են վերսկսվել արդեն հոկտեմբերին։ Միևնույն ժամանակ, Մոսկվայի և Կիևի առանցքային դիրքորոշումները, առաջին հերթին, տարածքների հարցում, շարունակում են էապես տարբերվել։
