Ավտոբուսի վարորդի նկատմամբ բռնության դեպքով այս պահին ոստիկանություն հաղորդում է ներկայացվում
Քիչ առաջ Երևանի քաղաքապետի մամուլի քարտուղար Հայկ Կոստանյանը գրառում արեց՝ նշելով, որ 97 համարի ավտոբուսում քաղաքացիների և վարորդի միջև միջադեպ է տեղի ունեցել, վարորդը ենթարկել է բռնության։
«97 համարի ավտոբուսի վարորդի կողմից ուղևորներին վճարում կատարելու հորդորից հետո երեք ուղևորի և վարորդի միջև առաջացել է վիճաբանություն, որի ընթացքում վարորդը ենթարկվել է բռնության։ Վիճաբանության ընթացքում բռնության է ենթարկվել նաև «Երևանի ավտոբուս» ՓԲԸ-ի մեկ այլ վարորդ։
Հասարակական տրանսպորտի վարորդների և ուղևորների անվտանգությունը մեզ համար առաջնային նշանակություն ունի, և նման դեպքերը չեն կարող հանդուրժվել։ Տվյալ միջադեպի կապակցությամբ ոստիկանություն է ներկայացվել հաղորդում, և ակնկալում ենք, որ մեղավորները կպատժվեն օրենքի ամբողջ խստությամբ։
Կոչ ենք անում քաղաքացիներին պահպանել հասարակական կարգը, հարգել միմյանց իրավունքներն ու հետևել օրենքի պահանջներին։ Հանրային տրանսպորտից օգտվելիս վճարումը պարտադիր է, և յուրաքանչյուրի պարտքն է կատարել սահմանված կանոնները»,- գրել է Կոստանյանը։
ՀՀ ՆԳՆ Ոստիկանությունից MediaHub-ին հայտնեցին, որ այս պահին Նուբարաշենի բաժնում ընդունվում է հաղորդում, դեպքի մանրամասների վերաբերյալ ավելի ուշ հաղորդագրություն կտարածվի։
Նարե Գնունի
