Մենք որևէ տեսակի հող ու տարածք չունենք, որ պատկանում է թշնամուն, հակառակը՝ ունենք մեզնից բռնագրավված հող. Բագրատ Սրբազան
Մենք որևէ տեսակի հող ու տարածք չունենք, որ պատկանում է թշնամուն, դեռ հակառակը՝ ունենք հող, տարածք, Հայրենիք, որը բռնագրավված է մեզնից և մենք էլ կոչումն ունենք այդ բոլորը վերականգնելու: Այս մասին Նոյեմբերյանի տարածաշրջանի Կողբ համայնքում իր քարոզի ժամանակ ասել է Տավուշի թեմի առաջնորդ Բագրատ Արքեպիսկոպոս Գալստանյանը:
«Սա միանշանակ ուղերձ է բոլորին՝ հայախոս եւ ոչ հայախոս թշնամիներին, հստակ կերպով շատ պարզ եւ ուղիղ: Բավական է մեր կյանքը կտրտեք, անընդհատ կտրտել, որովհետեւ ոչ Աստծուց եք վախենում, ոչ էլ մարդկանցից եք ամաչում, որովհետեւ անիրավությունը ձեր կյանքի սկզբունքն է, անօրինությունն էլ վրադիր: Սա անթույլատրելի է մեզ համար եւ ինձ համար անձնապես: Մենք պետք է հասկանանք՝ ուր ենք գնում, իւնչ անդունդի մեջ ենք գլորում ինքներս մեզ, եւ վերջապես այս բոլոր արհավիրքները որքան ենք պատրաստ կլանելու, ընդունելու, եւ ուտելու, խմելու, վաճառականությամբ զբաղվելու: Այդ ժամանակը լրանում է, մենք կոչված ենք արդարություն, ճշմարտություն գործելու, մենք կոչված ենք մեզ կտակված ու ժառանգված հայրենիքի ժառանգությանը տեր լինելու ի վերջո»,- ասել է նա:
Բագրատ Սրբազանը նշել է, որ սա ընտրություն է մեզ համար՝ ընտրում ենք բախտի Աստծուն, թե դեւերին:
