Հարավային Կորեան ԿԺԴՀ-ից օգնություն է խնդրել անհետացած զինվորական նավաստու որոնումներում

Հարավային Կորեայի իշխանությունները դիմել են ԿԺԴՀ-ին՝ խնդրելով աջակցություն ցուցաբերել անհետացած զինվորական նավաստու որոնման և վերադարձի գործում, որինՃապոնական ծովում, ենթադրաբար, հոսանքը տարել է Հյուսիսային սահմանազատման գծից (NLL) այն կողմ, հայտնում է AFP-ն։

Հարավկորեական իշխանությունների տվյալներով, ռազմածովային ուժերի պարեկային նավում ծառայություն իրականացնող նավաստին անհետացել է հուլիսի 12-ի առավոտյան՝ երկրի արևելյան ափերի մոտ անվտանգության ապահովման առաջադրանք կատարելիս։ Ենթադրվում է, որ ջրի հոսանքը նրան կարող էր տանել սահմանազատման գծից հյուսիս ընկած ջրեր։

Կորեայի Հանրապետության միավորման հարցերով նախարարությունը կոչ է արել Փհենյանին համագործակցել որոնողական գործողության շրջանակում և վերադարձնել զինծառայողին «հումանիտար նկատառումներից ելնելով»։

Հարավային Կորեայի պաշտպանության նախարար Ան Գյու Բեկը զինվորականներին հանձնարարել է գործադրել բոլոր ջանքերը նավաստու հնարավորինս արագ և անվտանգ փրկության համար։

Դիմումն արվել է այն ֆոնին, երբ նախագահ Լի Չժե Մյոնը փորձում է նվազեցնել լարվածությունը ԿԺԴՀ-ի հետ հարաբերություններում։ 2025 թվականի հունիսին պաշտոնը ստանձնելուց հետո նա ընտրել է երկխոսության և վստահության ամրապնդման միջոցների ուղին, սակայն Փհենյանը դեռ չի արձագանքել Սեուլի նախաձեռնություններին և շարունակում է ամրապնդել համագործակցությունը Ռուսաստանի հետ։