Իրանական լցանավը բանակի աջակցությամբ մտել է երկրի տարածքային ջրեր
- 2 hours ago
- 1 min read
Իրանի զինված ուժերը նպաստել են իրանական լցանավի անցմանը երկրի տարածքային ջրեր՝ ԱՄՆ-ի կողմից իրականացվող ծովային շրջափակման ֆոնին. հայտնել է Իրանի Իսլամական Հանրապետության բանակը, հաղորդում է ՌԻԱ Նովոստի-ն:
«Իրանական լցանավը, Իրանի բանակի ռազմածովային ուժերի օպերատիվ աջակցությամբ, անցյալ գիշեր անցել է Արաբական ծովով և մտել Իրանի տարածքային ջրեր», - ասվում է բանակի հայտարարության մեջ, որը մեջբերում է Իրանի պետական հեռուստառադիոընկերությունը:
Իրանցի զինվորականները նշել են, որ լցանավին հաջողվել է խարիսխ գցել երկրի հարավային նավահանգիստներից մեկում՝ չնայած ԱՄՆ ռազմածովային նավատորմի կողմից հնչած սպառնալիքներին և նախազգուշացումներին:
Հիշեցնենք, որ ԱՄՆ ռազմածովային ուժերը ապրիլի 13-ին սկսել են Հորմուզի նեղուցի երկու կողմերում գտնվող իրանական նավահանգիստներ մուտք գործող և այնտեղից դուրս եկող ողջ ծովային երթևեկության շրջափակումը, որին բաժին է ընկնում նավթի, նավթամթերքի և հեղուկ բնական գազի համաշխարհային մատակարարումների մոտ 20%-ը: Վաշինգտոնը հավաստիացնում է, որ Իրանի հետ կապ չունեցող նավերը կարող են ազատորեն անցնել Հորմուզի նեղուցով, եթե նրանք Թեհրանին անցման համար վճարումներ չեն կատարել: Իրանի իշխանությունները վճարների սահմանման մասին չեն հայտարարել, սակայն խոսել են նման պլանների մասին:
