Ռուսական թանգարանն ավարտել է Այվազովսկու «Իններորդ ալիք» կտավի վերականգնումը
Ռուսաստանի պետական թանգարանի մասնագետներն ավարտել են աշխարհահռչակ հայազգի ծովանկարիչ Հովհաննես Այվազովսկու ամենահայտնի նկարներից մեկի՝ «Իններորդ ալիքի» վերականգնումը։ Ռիա նովոստիիհաղորդմամբ, հայտարարել է թանգարանի գլխավոր տնօրեն Ալլա Մանիլովան։
«Այսօր մեզ համար Ռուսական թանգարանում շատ ուրախ օր է, քանի որ մենք մեր այցելուներին, երկրին և Ռուսաստանի Դաշնության թանգարանային հավաքածուին նվիրում ենք մեծն Հովհաննես Այվազովսկու՝ ռեստավրացիայի և արվեստի համաշխարհային չափանիշներին համապատասխան վերականգնված կտավ՝ պատմական շրջանակով», - լրագրողներին ասել է նա։
«Իններորդ ալիքը» Այվազովսկին ստեղծել է 1850 թվականին։ Ավելի քան 120 տարի կենտրոնական տեղ է զբաղեցրել Ռուսական թանգարանի մշտական ցուցադրությունում: Նկարը թանգարանի հավաքածու է մտել 1897 թվականին՝ իր պատմական ոսկեզօծ շրջանակի հետ միասին: Այս ընթացքում աշխատանքը գործնականում որևէ լուրջ վերականգնման չի ենթարկվել, միայն տեղայնացված պահպանման աշխատանքներ են իրականացվել:
Նա նշել է, որ նկարի համապարփակ գիտական վերականգնումը տևել է չորս ամիս: Թանգարանի տվյալներով, վերականգնողները ամբողջ մակերեսով ամրացրել են նախաներկը և ներկի շերտը, վերականգնել են շերտազատված հատվածները և շտկել լաքի ծածկույթը, որը ժամանակի ընթացքում դարձել էր անհարթ և նկատելիորեն բծավոր:
