Հրազդանի համայնքային ոստիկանները բացահայտել են խաղատնից արված գողությունը (տեսանյութ)
Նոյեմբերի 18-ին՝ գիշերը ժամը 1.30-ին, Ծաղկաձորի մի խաղատնից ոստիկանության Հրազդանի բաժնում ստացվել է ահազանգ: Գողություն է տեղի ունեցել: Դեպքի վայր էր մեկնել ոստիկանութան Ծաղկաձորի բաժանմունքի օպերատիվ խումբը: Խաղատան աշխատակիցը հայտնել էր, որ մոտ մեկ ժամ առաջ անհայտ անձը անհայտ եղանակով բացել էր խաղային սարքի փականը և գողացել դրամարկղը, որի մեջ 16 հազար դրամ էր:
Բաժնի և բաժանմունքի ծառայողները ձեռնարկել են անհրաժեշտ միջոցառումներ, նաև` օպերատիվ-հետախուզական: Իսկ Հրազդանի համայնքային ոստիկանության բաժանմունքի ծառայողների ստացած տեղեկություններն իրացվել են լուսաբացին: Ժամը յոթին մոտ, գողությունը կատարելու կասկածանքով, Գեղարքունիքի մարզի Զովաբեր գյուղի իր տնից բերման է ենթարկվել 33-ամյա մի տղամարդ, իսկ քիչ անց` Հրազդան քաղաքի Կենտրոն թաղամասի 37-ամյա մի բնակիչ:
Զովաբերցին տվել է խոստովանական բացատրություն: Անձնական խուզարկությամբ նրա մոտ հայտնաբերվել է 16 հազար դրամը, իսկ տնից նա ներկայացրել է նաև գողացված դրամարկղը:
Խաղային սարքի փականը բացելու եղանակը և դեպքի այլ հանգամանքներ քննությամբ պարզվում են:
