Մանչեսթեր Սիթին հաղթեց Կոպենհագենին, իսկ Ռեալն արտագնա խաղում՝ Լայպցիգին

Չեմպիոնների լիգայի 1/8 եզրափակչի առաջին խաղում «Մանչեսթեր Սիթին» հաղթել է «Կոպենհագենին»։

Հանդիպումը կայացել է Կոպենհագենի «Պարկեն» մարզադաշտում և ավարտվել 3-1 հաշվով՝ հօգուտ անգլիական թիմի։

10-րդ րոպեին հյուրերի կիսապաշտպան Կևին Դե Բրույնեն բացեց խաղի հաշիվը։ Խաղակեսի վերջնամասում տանտերերին հաջողվեց հավասարեցնել հաշիվը Մագնուս Մատսոնի գոլի շնորհիվ։ Սակայն ընդմիջումից անմիջապես առաջ անգլիացիները ևս մեկ գոլ խփեցին․ աչքի ընկավ Բերնարդո Սիլվան։ Հանդիպման վերջին րոպեներին Ֆիլ Ֆոդենը սահմանեց վերջնական հաշիվը։

Պատասխան հանդիպումը կկայանա մարտի 6-ին Անգլիայում։

«Լայպցիգը» Չեմպիոնների լիգայի 1/8 եզրափակիչի շրջանակում այսօր հյուրընկալել էր Մադրիդի «Ռեալին»։

Հանդիպումն ավարտվեց հյուրերի՝ 1-0 հաշվով հաղթանակով։ Մադրիդյան թիմի կազմում հանդիպման միակ գոլն իր ակտիվում գրանցեց Բրահիմ Դիասը։

Թիմերի միջև պատասխան հանդիպումը կկայանա մարտի 6-ին՝ Մադրիդում։

Նշենք, որ այս հանդիպումը հոբելյանական էր իսպանական գրանդի ֆուտբոլիստ Ռոդրիգոյի համար․ բրազիլացին իր 200-րդ հանդիպումն անցկացրեց «Ռեալի» կազմում։