Իրանը շրջանառության մեջ է մտցրել ռեկորդային՝ 10 մլն ռիալ անվանական արժեքով թղթադրամ. FT
- 2 minutes ago
- 1 min read
Իրանը շրջանառության մեջ է մտցրել 10 մլն ռիալ անվանական արժեքով թղթադրամ՝ կանխիկ դրամի պահանջարկի կտրուկ աճի ֆոնին, պայմանավորված շարունակվող ռազմական հակամարտությամբ եւ ֆինանսական համակարգի խափանումների մտահոգությամբ։
Ինչպես տեղեկացրել է Financial Times-ը, իշխանություններն արագացրել են խոշոր թղթադրամների թողարկումը՝ իրացվելիությունը պահպանելու եւ անկայունության պայմաններում բնակչությանը կանխիկով ապահովելու համար։
Պարբերականի տվյալներով՝ երկրի բնակիչները ակտիվորեն կանխիկ գումար են հանում իրենց հաշիվներից՝ վախենալով բանկերի, վճարային համակարգերի եւ ընդհանուր առմամբ ենթակառուցվածքի հնարավոր խափանումներից։ Սա հանգեցրել է հերթերի բանկոմատների մոտ եւ բանկային ոլորտի վրա ճնշման աճի։ Ի պատասխան՝ ֆինանսական մարմինները ձգտում են ավելացնել շրջանառության մեջ գտնվող կանխիկի քանակը՝ խուճապը կանխելու եւ երկրի ներսում անխափան վճարումներ ապահովելու համար։
Նոր թղթադրամի անվանական արժեքը, չնայած իր մեծությանը, համարժեք է ընդամենը մի քանի ԱՄՆ դոլարի, ինչն արտացոլում է երկարաժամկետ գնաճը եւ ազգային արժույթի արժեզրկումը։ Մասնագետները նշել են, որ նման միջոցառումները վկայում են ֆինանսական շուկայում անհանգստության աճի եւ բնակչության՝ միջոցների պահպանման ավելի անվտանգ ձեւի անցնելու ցանկության մասին։
