Որևէ արձանագրություն կազմված չէ․ բերման ենթարկված մեր հայրենակիցները ապօրինաբար գտնվում են անազատության մեջ․ Մարիաննա Ղահրամանյան

Այս պահի դրությամբ որևէ արձանագրություն կազմված չէ, և բերման ենթարկված մեր հայրենակիցները ապօրինաբար գտնվում են անազատության մեջ։ Այս մասին լրագրողների հետ զրույցում ասել է «Ուժեղ Հայաստան» կուսակցության մամուլի խոսնակ Մարիաննա Ղահրամանյանը։

«Սա փաստաբանները գնահատում են որպես նրանց իրավունքների կոպիտ խախտում, հիշեցնեմ՝ 17 անձ է բերման ենթարկվել, նրանք մեր աջակիցներն են, Սամվել Կարապետյանի աջակիցներն են, նրանց բերման ենթարկելու փաստը, նախորդ երկու օրերի զարգացումները վերահաստատում են, որ իշխանությունները գտնվում են խուճապի մեջ, իշխանությունները վախեցած են, փորձում են նմանատիպ գործողություններով ճնշում գործադրել։ Բերման ենթարկվածների հետ կապված որևէ կարգավիճակ չկա, որևէ արձանագրություն կազմված չէ, բերման ենթարկվածները 2,5 ժամ շարունակ գտնվում են ապօրինի անազատության մեջ»,-նշել է նա։