ԱՄՆ-ում բողոքի ակցիաներ են ընթանում Իրանի դեմ «պատերազմական անօրինական գործողության» դեմ

Վաշինգտոնում, Նյու Յորքում և այլ քաղաքներում մարդկանց բազմություն է հավաքվում՝ դատապարտելով Իրանին հասցված Թրամփի հարվածները և դրանք պատերազմական անօրինական գործողություն որակելով, գրում է The Guardian-ը։

Բողոքի ցույցերի մասնակիցները հավաքվել են Միացյալ Նահանգների ողջ տարածքում, այդ թվում՝ Սպիտակ տան մոտ և Նյու Յորքի Թայմս սքվերում՝ իրենց անհամաձայնությունը հայտնելու տարածաշրջանում ԱՄՆ-ի ռազմական միջամտությանը։

«Սա չի արտոնվել Կոնգրեսի կողմից, ուստի այն, ինչ անում է Թրամփը, նրա անձնական նախաձեռնությունն է. դա նրան ֆաշիստ է դարձնում, իսկ երկիրը վերածում ֆաշիստական պետության»,- ասել է ցույցի մասնակից Սյու Ջոնսոնը։

Տասնյակ բողոքի ցույցեր կազմակերպել է ձախակողմյան խմբերի կոալիցիան, որի կազմում են՝ ANSWER Coalition, National Iranian American Council, 50501, American Muslims for Palestine, People’s Forum, Palestinian Youth Movement, CodePink, Black Alliance for Peace և Democratic Socialists of America կազմակերպությունները։

Կոալիցիան հայտարարել է նաև շաբաթ օրը կայացած այլ «հրատապ բողոքի ցույցերի» մասին՝ Ատլանտայում, Բալթիմորում, Բոստոնում, Չիկագոյում, Ցինցինատիում, Դենվերում, Լաս Վեգասում, Լոս Անջելեսում, Մայամիում և Մինեապոլիսում։

Կիրակի օրը ակցիաներ կանցկացվեն մի շարք այլ քաղաքներում, այդ թվում՝ Օլբանիում (Նյու Յորք նահանգ), Էլենսբերգում (Վիրջինիա), Չատանուգայում (Թենեսի), Դեկորայում (Այովա), Գեյնսվիլում (Ֆլորիդա) և Սփրինգֆիլդում (Միսուրի)։

Կազմակերպիչները հայտարարություն են տարածել, որտեղ ասված է. «Թրամփի չհրահրված, անօրինական հարձակումն Իրանի վրա պատերազմական գործողություն է, որը սպառնում է աներևակայելի զոհերով և ավերածություններով։ Սակայն այս երկրի ժողովուրդը մերժում է հերթական անվերջ պատերազմը և դուրս կգա փողոց հենց հիմա, որպեսզի մեր ձայնը լսելի լինի»։

Նյու Յորքի քաղաքապետ Զոհրան Մամդանին ավելի վաղ հայտարարել էր, որ Իրանի նկատմամբ ԱՄՆ-ի և Իսրայելի հարվածները «նշանակում են անօրինական ագրեսիվ պատերազմի աղետալի սրացում։ Քաղաքների ռմբակոծություններ։ Խաղաղ բնակիչների սպանություններ։ Ռազմական գործողությունների նոր թատերաբեմի բացում։ Ամերիկացիները դա չեն ուզում։ Նրանք չեն ուզում վարչակարգի փոփոխությանն ուղղված ևս մեկ պատերազմ»։

Ամերիկյան քաղաքացիական ազատությունների միությունը միացել է տասնյակ դեմոկրատ օրենսդիրների՝ պահանջելով Կոնգրեսից անհապաղ միջոցներ ձեռնարկել Իրանի դեմ Թրամփի կողմից ռազմական ուժի հակասահմանադրական կիրառումը դադարեցնելու համար։ Իրավապաշտպան կազմակերպությունը նշել է, որ «հետևողականորեն պնդել է՝ Վիետնամից մինչև Աֆղանստանի պատերազմ, Իրաքի երկու պատերազմները, Լիբիայի դեմ ռազմական գործողությունը և ուժի շարունակական կիրառումը Իրաքում, Սիրիայում, Եմենում և Սոմալիում, որ Սահմանադրությունը հստակ սահմանում է՝ ռազմական ուժի կիրառման որոշումները պահանջում են Կոնգրեսի հատուկ նախնական թույլտվություն»։

Ինչպես նշում է The New York Times-ը, ԱՄՆ-ի՝ Իրանի վրա հարձակման հանրային աջակցությունը ցածր է եղել դեռևս նախքան Թրամփի և Իսրայելի կողմից Իրանին հարվածելը։

Մերիլենդի համալսարանի՝ երկու շաբաթ առաջ անցկացրած հարցման համաձայն՝ ամերիկացիների մեծ մասը հայտարարել է, որ կա՛մ դեմ է նման գործողություններին (49 տոկոս), կա՛մ վստահ չէ (30 տոկոս)։

Հանրապետականների շրջանում նույնպես տարակուսանք է նկատվել. 40 տոկոսը կողմ է եղել հարվածին, 25 տոկոսը՝ դեմ, իսկ 35 տոկոսը հայտնել է, որ չգիտի։

Անցյալ շաբաթ անցկացված AP-NORC հարցումը ցույց է տվել Թրամփի՝ ռազմական ուժը ճիշտ տնօրինելու կարողության նկատմամբ վստահության ցածր մակարդակ։ Ամերիկացիների միայն 27 տոկոսը և քաղաքականապես անկախների ընդամենը 14 տոկոսն է նշել, որ վստահում է նրան արտերկրում ռազմական ուժի կիրառման հարցերում ճիշտ որոշումներ կայացնելու գործում։

Միևնույն ժամանակ, հարցումը ցույց է տվել, որ ԱՄՆ-ի բոլոր չափահաս բնակիչների գրեթե կեսը չափազանց կամ շատ է անհանգստացած Իրանի միջուկային ծրագրով։ Եվս 31 տոկոսը չափավոր է մտահոգված եղել։