Ինչու են ձգձգվում ձնամաքրումից հետո Երևանի փողոցներից աղի ու ավազի մաքրման աշխատանքները

Ձնամաքրման աշխատանքներից հետո Երևանի փողոցներում մնացած աղի ու ավազի մաքրման աշխատանքները կավարտվեն այս շաբաթ։ Այս մասին, այսօր՝ փետրվարի 23–ին, Երևանի քաղաքապետարանի գործակարգավարական խորհրդակցության ժամանակ հայտնեց «Երևանի աղբահանության և սանմաքրման» հիմնարկի (ԵԱՍՄ) տնօրեն Սաշա Կատվալյանը։

Հատկանշական է, որ փետրվարի 16-ին կայացած խորհրդակցության ժամանակ նույն Կատվալյանը վստահեցրել էր, որ մաքրման գործընթացը կավարտվի 1 շաբաթում։

«Երևանի փողոցներն ինտենսիվորեն մաքրվում են աղի և ավազի խառնուրդի մնացորդներից։ Աշխատանքները մի փոքր դանդաղում են, քանի որ կուտակված շերտը բավականին հաստ է և կոշտացած որոշ փողոցներում, ու դա հնարավոր է հեռացնել միայն տրակտորով և բահով։ Այդ տարածքները մաքրումից հետո կարգի են բերվում փոշեկուլ և ջրցան մեքենաներով»,- ասաց նա։

Կատվալյանի խոսքով` նախորդ շաբաթ ԵԱՍՄ հիմնարկն օգտագործել է մոտ 70 միավոր տեխնիկա, իսկ վարչական շրջանները տրամադրել են 78 միավոր տրակտոր և ինքնաթափ։

Նա նշեց, որ այս պահին մայրաքաղաքում աշխատանքների մոտ 70 տոկոսն իրականացված է. «Նախատեսում ենք, որ այս շաբաթ վերջնական կավարտենք»,- ասաց ԵԱՍՄ հիմնարկի տնօրենը։

Երևանի քաղաքապետ Տիգրան Ավինյանն էլ ևս մեկ անգամ ժամկետները ճշտեց ու հետաքրքրվեց՝ արդյոք բոլոր վարչական շրջաններն են անհրաժեշտ տեխնիկա տրամադրել։ Կատվալյանը պատասխանեց՝ գրեթե բոլոր վարչական շրջանները։