Վլադիմիր Կլիչկոյի նախկին հարսնացուն բացատրել է, թե ինչու է լքել դստերը

Դերասանուհի Հեյդեն Պանետյերը անկեղծորեն կիսվել է իր կյանքի ամենացավոտ շրջաններից մեկի մանրամասներով՝ խոսելով իր դստեր՝ Կայայի խնամակալությունը նախկին փեսացուին՝ բռնցքամարտիկ Վլադիմիր Կլիչկոյին  հանձնելու որոշման մասին՝ հետծննդյան դեպրեսիայի և կախվածության դեմ պայքարի ֆոնին։

36-ամյա դերասանուհին խոստովանել է, որ 2018 թվականին կամավոր կերպով ստորագրել է իր՝ այն ժամանակվա փոքրիկ դստեր խնամակալության փաստաթղթերը՝ հասկանալով, որ օգնության կարիք ունի։ Նա նկարագրել է, որ այդ ժամանակ «հուսահատորեն կարիք ուներ աջակցության» և անկարող էր ինքնուրույն հաղթահարել իր հուզական վիճակը։

«On Purpose with Jay Shetty» փոդքասթի ժամանակ Պանետյերը հերքել է տարածված այն կարծիքը, թե իր որոշումը պարտադրված էր կամ անտարբերությունից բխած։ Նա ընդգծել է, որ «երեխայից հրաժարվելու» գաղափարը խորապես վիրավորում է իրեն, քանի որ այն չի արտացոլում իրականությունը։

«Այն միտքը, որ ինչ-որ մեկը կմտածի, որ ես պարզապես լքել եմ իմ երեխային և չեմ հոգում նրա մասին, կոտրում է սիրտս։ Դա բացարձակապես ճիշտ չէ», - ասել է դերասանուհին։ Նա բացատրել է, որ այդ ժամանակահատվածում տառապել է ուժեղ անհանգստությունից, դեպրեսիայից և հետծննդյան դեպրեսիայի հետևանքներից՝ միաժամանակ շարունակելով աշխատել և ձևացնել, որ «նորմալ կյանք է վարում»՝ չնայած իր ներքին ճգնաժամին։

Պանետիերը նաև բացահայտել է, որ ինքն է որոշել դիմել մասնագիտական ​​օգնության՝ հերքելով այն լուրերը, թե իրեն հարկադրաբար են բուժել։ Նա ասել է, որ իրավիճակն այնքան ծանր էր, որ ինքը գիտեր, որ չի կարող շարունակել այդպես ապրել։

Չնայած դժվարին ժամանակահատվածին՝ Պանետիերը շեշտել է, որ պահպանում է մտերիմ հարաբերություններ իր դստեր հետ, որն այժմ ապրում է Եվրոպայում հոր հետ։ 

«Մենք ունենք անհավանական հարաբերություններ։ Ես ճանապարհորդում եմ, երբ կարող եմ, և մենք հաճախ խոսում ենք FaceTime-ով։ Մենք շատ խորը կապ ունենք»,-նշել է դերասանուհին՝ հավելելով, որ իր գլխավոր նպատակն է, որ իր դուստրը զգա սիրված և պաշտպանված երկու ծնողների կողմից։

Պանետիերը նաև անդրադարձել է հետծննդյան դեպրեսիայի թեմային՝ ընդգծելով, որ այս վիճակը դեռևս շրջապատված է բազմաթիվ կարծրատիպերով և թյուրըմբռնումներով։ Նա խոստովանել է, որ կարծում էր, որ մայրությունը բոլորովին այլ կլիներ, բայց իրականությունը շատ ավելի բարդ և ցավոտ է եղել։