ՑԻՆԻԿ ԱՐԱՐՔ ՄԽԻԹԱՐՅԱՆԻ ՀԱՆԴԵՊ. ԻՆՉ Է ՏԵՂԻ ՈՒՆԵՑԵԼ ԱՄՆ-ՈՒՄ
Աշխարհի ակումբային առաջնության 1/8 եզրափակիչ փուլում կայացած «Ինտեր» – «Ֆլումինենսե» հանդիպման առաջին կեսի վերջնամասում տեղի է ունեցել սկանդալային միջադեպ:
«Ինտերի» հայ կիսապաշտպան Հենրիխ Մխիթարյանը հանդիպման դրվագներից մեկում փորձել է արագ վերսկսել խաղը՝ գնդակը ձեռքով տանելով, սակայն նրան խանգարել է մրցակցի գլխավոր մարզիչը։ Բրազիլական «Ֆլումինենսեի» գլխավոր մարզիչ Ռենատո Գաուշոն անսպասելիորեն ոտքով խլել է գնդակը Մխիթարյանի ձեռքից՝ խոչընդոտելով վերջինիս գործողություններին։
Միջադեպի ժամանակ Մխիթարյանը անմիջապես արձագանքել է և մոտեցել Գաուշոյին՝ պարզաբանում պահանջելու նպատակով։ Տարաձայնությունը վերածվել է կտրուկ լարվածության, ինչին միջամտել է հանդիպման գլխավոր մրցավարը։ Վերջինս որոշել է մարզչին պատժել դեղին քարտով՝ նրա ոչ սպորտային վարքի համար։
Դրվագը լայն արձագանք է գտել երկրպագուների և մարզական մամուլի շրջանակում՝ որպես ոչ սովորական ու անթույլատրելի պահ նման մակարդակի մրցաշարում։
