Դեբեդ գետն անցած գիշեր քշել տարել է Քարկոփի նոր կամուրջը

Քարկոփը դարձյալ մեկուսացման մեջ է հայտնվել։ Նորից վարարած Դեբեդ գետը քշել տարել է Քարկոփի նոր տեղադրված ժամանակավոր կամուրջը՝ նախատեսված հետիոտնի համար։

Կամուրջը գետից մոտ 1-1․5 մետր բարձր էր, գետն այդքան բարձրացել ու քշել է այն։ Կամրջի վրայով էր անցնում նաև Քարկոփի ջրատարը, որը մայիսի 26-ի ջրհեղեղից հետո էր անցկացվել, այժմ այդ ջրատարն էլ չկա, Քարկոփը դարձյալ ջրազրկված է։ Նկատենք, որ Քարկոփում դեռևս ապրելու պայմաններ չկան։ Այն ամենաշատ տուժած բնակավայրերից է, որը շուրջ 1-1,5 մետր ծածկվել էր ջրով։

«Երեք օր կրկին անձրևներ են տեղացել, Դեբեդն անցած գիշեր նորից քշել տարել է Քարկոփ գյուղի հետիոտնային կամուրջը, որն օրերս ճոպաններով կապվել էր՝ Քարկոփ համայնքը արտաքին աշխարհի հետ կապելու համար։ Գետը կրկին վարարել էր, բայց մարդու վնաս չի տվել» , - «Փաստինֆո»-ին ասել է Ախթալայի համայնքապետ Սևակ Սարգսյանը։

Նրա փոխանցմամբ՝ այս պահին աշխատանքներ են արվում՝ գետի երկու ափերը միմյանց հետ կապելու համար։

Ախթալայի համայնքապետն ասաց, որ ինտենսիվ աշխատանքներ են արվում երկաթգծի վերականգնման համար։