«Կոչ ենք անում ազգային ուժերին միավորել ջանքերը՝ ապազգային իշխանությանը հեռացնելու գործում»․ Իշխան Սաղաթելյան
«Նոր իրողությունների պայմաններում հանձնառություն ունենք առաջարկելու մեր ժողովրդին պայքարի ու վերականգնման նոր տեսլական ու ծրագիր։ Խնդիր ունենք դիմագրվելու նոր թափ առած հակադաշնակցականությանը, որն արդեն վերածվել է ազգային գաղափարախոսության դեմ պայքարի։ Հայրենիքի պաշտպանությունը պետք է դառնա մեր գլխավոր ուղենիշը»,- ՀՅԴ 35-րդ Ընդհանուր ժողովում հայտարարեց ՀՅԴ ԳՄ անդամ, ԱԺ «Հայաստան» խմբակցության պատգամավոր Իշխան Սաղաթելյանը։
«Պայքար բոլոր ճակատներում ու ամենուր, պայքար հայ ժողովրդի իրավունքների վերականգնման համար, սա է այն առաջարկը, որ Դաշնակցությունը կարող է ներկայացնել իր ժողովրդին։ Պայքար, որի մեջ պետք է լինենք և՛ կազմակերպիչը, և՛ զինվորը, և՛ առաջամարտիկը, քանզի հայրենիքի ու Դաշնակցության ճակատագիրը միահյուսված է»,- ասաց նա՝ հավելելով, որ Հայաստանի վերակառուցումը, հաշտեցումն ու նորոգումը, Հայաստան-Արցախ-սփյուռք եռամիասնության վերականգնումն այլընտրանք չունի։
«ՀՅԴ-ն առողջ ու ազգային ուժերին կոչ է անում միավորել ջանքերը ապազգային իշխանություններին հեռացնելու, հայ ժողովրդին ու մեր պետականությանը սպառնացող վտանգները չեզոքացնելու, նոր որակի ազգային պետություն ձևավորելու ու համահայկական կարողականությամբ ուժեղ Հայաստան կառուցելու գործում»,- ասաց նա։
