Փորձում են կեղտոտել ու փչացնել ամենամաքուրն ու չքաղաքականացվածը․ Համոզված եմ՝ մեր սիրելի արտիստը` Մկոն, իրեն բնորոշ համեստությամբ կշարունակի անել իր գործը․ Առուշանյան
- Elen Hovsepyan
- Sep 16
- 1 min read
Շիրակի մարզպետ Դավիթ Առուշանյանը ֆեյսբուքյան իր էջում գրել է․
Առաջին դեպքը չէ, ցավոք, ոչ էլ վերջինը, երբ հասարակության մի փոքր զանգված, բացառապես քաղաքական նկատառումներով, փորձում է կեղտոտել ու փչացնել ամենամաքուրն ու չքաղաքանացվածը, արժեքավորը, որը քննարկման առիթ անգամ չպետք է դառնար:
Փորձում են, բայց հաջողու՞մ են արդյոք:
Մկրտիչ Արզումանյանը մեր ժամանակների ամենատաղանդավոր արտիստներից է, միևնույն ժամանակ համեստ, զուսպ ու աշխատասեր մարդ, որը երբևէ չի տրվել որևէ ժամանակի սադրանքի, լուռ աշխատել է, իր գործն արել, արժեք ստեղծել:
Արժանապատիվ հայ մարդ, որը վստահաբար, իր մեջ կրում է նաև գյումրեցու պատվախնդրություն:
Ցավում եմ, որ մենք դեռ չենք կարողանում ըստ արժանիքի գնահատել այն մարդկանց, որոնք իսկական նվիրյալ են, արդարամիտ են, քաղաքականացված չեն, թեև այսօր փորձում են քաղաքական շարժառիթներով թիրախավորել արտիստին:
Մեր տաղանդավոր հայրենակիցներին անհիմն ու անիմաստ, իբր թե սուր քննադատության արժանացնելով` հարվածում ենք ինքներս մեզ ու մեր ինքնությանը, մեր իսկական արժեքներին: Խորհուրդ կտամ` պարզապես հեռու մնալ նրանցից: Ինչը անբիծ է` կեղտոտել պարզապես չի ստացվի, որովհետև ձեր որևէ մեղադրանք չունի հիմք և խոսք է օդում:
Համոզված եմ, որ մեր սիրելի արտիստը` Մկոն, իրեն բնորոշ համեստությամբ կշարունակի անել իր գործը` մնալով իսկական հային ու գյումրեցուն բնորոշ որակներին հավատարիմ:
