Այդ բազմապիսի՝ չալպտուրիկ, կարմիր, կապույտ բերետների ստորաբաժանումների միջև արդյո՞ք վրածածկ չկա․ Արթուր Խաչատրյանը՝ նախարարին
- Elen Hovsepyan
- May 29, 2024
- 1 min read
Այդ բազմապիսի բերետները, այդ համազգեստները, որ ոնց որ 18-րդ դարի լինի՝ տարբեր գույներ, ֆորմաներ` չալպտուրիկ, կարմիր, կապույտ և այլն, երբ ՆԳՆ-ն հայտ է ներկայացնում ֆինանսների նախարարությանը, դուք հարցնո՞ւմ եք, թե այդ տարբեր ստորաբաժանումների գործառույթների միջև արդյոք վրածածկ չկա։
Այս մասին ԱԺ-ում 2023-ի բյուջեի կատարողականի հաշվետվության ժամանակ ասաց «Հայաստան» խմբակցության պատգամավոր Արթուր Խաչատրյանը։
«Եթե ատոմակայանի անվտանգությունը պահպանում են այլ հատուկ ուժեր, այդ դեպքում հարց է առաջանում՝ մյուս հատուկ ուժերը՝ հատուկ գունդ, հատուկ գումարտակ, ի՞նչ են անում»,- ասաց նա։
Արձագանքելով՝ ֆինանսների նախարար Վահե Հովհաննիսյանն ասաց, որ ֆինանսների նախարարությունն այդ ուղղությամբ քաղաքականություն մշակող կառույց չէ։
«Մենք, իհարկե, որոշ դեպքերում որոշ հարցեր տալիս ենք, երբ այդ մասնագիտական կարողություններն ունենք։ Քանի որ ամեն առանձին մարմին ինքն է կոչված իր քաղաքականությունն իրականացնելու ու իրենք գիտեն, թե ինչպես պետք է անվտանգությունը ճիշտ ապահովել, մենք այդտեղ շատ հարցեր չունենք տալու»,- ասաց նախարարը։
Անդրադառնալով Արթուր Խաչատրյանի հարցին՝ Ծովինար Վարդանյանն իր հերթին ասաց․
«Պարո՛ն Խաչատրյան, խնդրում եմ հարգանքով խոսել, բազմապիսի բերետներ չեն ու մարդկանց գունային բաշխումների այդ հիվանդությունը չգիտեմ՝ որտեղից է եկել»։
