Սիրիայի զինված ուժերը հակահարձակում են իրականացնում Հալեպում և Իդլիբում

Սիրիական բանակը Հալեպում և Իդլիբում հակահարձակում է իրականացնում «Հայաթ Թահրիր ալ-Շամ» (նախկին «Ջաբհաթ ալ-Նուսրա») ահաբեկչական խմբավորման ուժերի դեմ։ «ՌԻԱ նովոստի» -ի փոխանցմամբ՝ այդ մասին հայտնում է Al-Mayadeen հեռուստաալիքը։

«Սիրիական արաբական բանակը սկսել է հետ մղել զինված խմբավորումների ինտենսիվ հարձակումը Հալեպի և Իդլիբի գյուղերում։ Թղթակիցը հայտնել է, որ սիրիական բանակը սկսել է հակահարձակում` թիրախավորելով զինված խմբավորումների գրաված դիրքերը Իդլիբի հարավ-արևելքում»,- ասվում է հաղորդագրության մեջ:

Հեռուստաալիքի տվյալներով՝ բանակին հաջողվել է ազատագրել Ալ-Բակում քաղաքը։

Անցյալ չորեքշաբթի «Հայաթ Թահրիր ալ-Շամ»-ին պատկանող խմբավորումները խախտեցին հրադադարի համաձայնագիրը և հարձակվեցին Հալեպ և Իդլիբ նահանգների վրա։ Լայն ճակատով նրանք գրոհում էին գյուղերը, քաղաքները, մարտական դիրքերը։

Սիրիական բանակը պատասխանել է հարձակմանը։ Սիրիայում պատերազմող կողմերի հաշտեցման ռուսական կենտրոնի ղեկավարի տեղակալ, կապիտան Օլեգ Իգնասյուկի խոսքով՝ սպանվել է առնվազն 400 ահաբեկիչ։